Medhanialem Mehaber’s Poem

 

ለውድ  አህታችን ምርጥ ዓለም – ሚስጥረ ስላሴ

እህቶችሽ ሁሉ የመድኃኒዓለም

አዘኑ አለቀሱ መላው ጠፋባቸዉ

አንደወጣሽ ቀርተሽ ስትጠፊባቸው::

ማህበራችን ቀኑ መቼ ደርሶ እያሉ

ያንቺን ድኖ መምጣት ይጠባበቃሉ::

ያ የሚያመረው ዓይነሽ ሰው የሚናፍቀው

ደከመሽ ታከተሽ በቃ ተከተተዉ::

ትህትናሽ መጣ ታየን ከፊታችን

እህቶችሽ ሁሉ አዘነ ልባችን::

ሳትሰናበችን እንዲህ መሄድን

ከየት አመጣሽው የሌለብሽን::

መልክሽ ሳይለወጥ እንደቆነጀሽ

የአምላክ ፈቃድ ሆኖ እሱ ወሰደሽ::

ኪድዬ የምትያት ኪዳነ ምህረት

በቀኗ ደረሰች አንቺጋ ድንገት::

የኔ መድኃኒዓለም ስትይው ሁልጊዜ

አንቺን መረጠና ወሰደሽ በጊዜ::

የኛ መድኃኒዓለም ሁሉን የምትሠራ

ምርጥዬን በገነት አኑራት አደራ::


ክቡራንና ክቡራት ሀዘንተኞች:-

በዛሬዉ ዕለት ከመሐከላችን የተለየችን በጣም የምናፈቅራትና የምንወዳት ደግ ሰው አፍቃሪ ፈገግታዋ ቤት የሚሞላ ሃይማኖቷ የጠበቀ እህታችንን ምርጥ ዓለም ታከለን ስንሸኝ የመድኃኒዓለም እህትማማቾች ማህበር አባላት የተሰማንን ጥልቅ ሐዘን ለመግለጽ ቃላቶች ያጥሩናል::  ምኞታችን የነበረው አንድ ቀን ጤናዋን ተጎናጽፋ እዚህ መድረክ ላይ አብረን ቆመን የምስጋና መዝሙር ለማቅረብ ነበር:: ነገር ግን ይህ ሳይሆን ቀርቶ ከልብ የምታፈቅራቸውን ባለቤቷንና ልጆችዋን ተለይታ ወደ ፈጣሪዋ ተጠርታ ከመሐከላችን ተለይታለች::

የመድኃኒዓለም እህትማማቾች ማህበር ለባለቤቷ ለአቶ መኮንን በጋሻው:- ለውድ ልጆችዋ ለሜሮንና ለሜላት:- ለእናቷና መላው ቤተሰብ እግዚአብሔር ጥናቱንና ብርታቱን እንዲሰጥልን:- የውድ እህታችን የምርጥ ዓለም ታከለን ነፍስ በአብርሃምና ይስሐቅ ጎን እንዲያኖርልን እንለምናለን::

Leave a Reply

Your email address will not be published. Required fields are marked *